ကလေးတွေ ဘာကြောင့် စာမလုပ်ချင်ကြတာလဲ?
(မိဘတိုင်း သိထားသင့်တဲ့ အဓိကအချက် (၅) ချက်)

ကလေးအရွယ်၊ ကျောင်းသားအရွယ်ဆိုတာ အပူအပင်ကင်းတဲ့ အရွယ်လေးတွေပါ။ ပြီးတော့ ကျွန်တော်တို့အားလုံးရဲ့ အပျော်ရဆုံး အချိန်တွေထဲက တစ်ချိန်၊ အမှတ်တရတွေ ပြည့်နှက်နေတဲ့ အချိန်လေးတွေလို့လည်း ပြောနိုင်ပါတယ်။ ဖေဖေမေမေတို့အတွက်ကတော့ “စာလုပ်၊ စာကျက်၊ အိမ်စာရေးရမယ်” ဆိုတာကို နေ့တိုင်း အသံသွင်းထားသလို မကြာခဏ အော်ပြောရတဲ့ အရွယ်လို့လည်း ဆိုရမှာပါ။

တကယ်တော့ စာလုပ်ရတာ ကြိုက်တဲ့ကျောင်းသားဆိုတာ ရှားပါတယ်။ အခုပြောပြပေးမယ့် အကြောင်းအရာလေးက စာကြိုးစားတဲ့ ကျောင်းသားတွေအတွက်တော့ အထွေအထူး မဟုတ်ပေမယ့် အတန်းထဲမှာ အမြဲနောက်ကောက်ကျနေတဲ့ ကျောင်းသားတွေ၊ စာမလုပ်ချင်တဲ့ ကျောင်းသားတွေ ဘာကြောင့် စာမလုပ်တာလဲ၊ ဘာ့ကြောင့် စာမလုပ်ချင်ရတာလဲဆိုတဲ့ အကြောင်းရင်းတွေထဲက အချို့ကို မိဘများ သတိပြုမိစေရန် ဝေမျှပေးသွားမှာ ဖြစ်ပါတယ်။

၁ ) စာမလိုက်နိုင်လို့
စာမလုပ်ချင်ရတဲ့ အကြောင်းတွေထဲမှာ စာမလိုက်နိုင်တာဟာ ထိပ်ဆုံးက ဖြစ်ပါတယ်။ ကျောင်းမှာ လူအများနဲ့ သင်ရတဲ့အခါ ဆရာတွေအနေနဲ့လည်း လစ်ဟာမှုလေးတွေ ရှိနိုင်သလို၊ ကျောင်းသားတွေအနေနဲ့လည်း သူငယ်ချင်းတွေနဲ့ စကားပြောမိလိုက်တာ၊ သင်တာမကြားလိုက်တာ ဒါမှမဟုတ် နားမလည်လိုက်တာမျိုးတွေ ရှိတတ်ပါတယ်။

ကျောင်းသားတွေအနေနဲ့ လူအများကြားမှာ ကိုယ်နားမလည်လို့ ဆရာကို ပြန်မေးရမှာကို ရှက်တာ၊ ကြောက်တာတွေ ဖြစ်တတ်တာကြောင့် နားမလည်ရင်လည်း ပြန်မမေးကြပါဘူး။ ဒီလိုနဲ့ အိမ်ရောက်လို့ စာပြန်လုပ်တဲ့အခါ အဲ့ဒီဘာသာရပ်ကို နားမလည်တော့လို့ ပြန်မလုပ်ချင်တော့ပါဘူး။ ပြန်လည်းမမေးဖြစ်၊ ဒီလိုနဲ့ မလုပ်ဖြစ်တော့မရ၊ မရတော့ ပိုမလုပ်ချင်နဲ့ "သံသရာလည်" နေတော့တာပါပဲ။

၂ ) အချိန်ဆွဲလုပ်တတ်တဲ့အကျင့်ကြောင့်
ဒါကတော့ ကျောင်းသားတွေတင်မကပါဘူး၊ ကျွန်တော်တို့ လူကြီးတော်တော်များများမှာလည်း အချိန်ဆွဲတတ်တဲ့ အကျင့်ရှိကြပါတယ်။ မလုပ်မဖြစ်တဲ့ အချိန်ကျမှ လုပ်ကြတယ်။ စာမေးပွဲနီးမှ စာကပ်ကျက်ကြတယ်။

ဘာသာတိုင်းကို အချိန်နီးမှ ကပ်လုပ်တော့ စာမလုပ်ဖြစ်တဲ့ အကြွေးတွေ ထပ်နေပြီး အချိန်ကြာလာတဲ့အခါ နားမလည်တော့ပါဘူး။ စာတွေအများကြီးကို အချိန်ခဏလေးနဲ့ မှတ်ရတော့ ကျက်စာမေ့တာတွေ၊ သီအိုရီရောကုန်တာတွေနဲ့ ရှုပ်ထွေးပြီး စာကို လုံးဝမလုပ်ချင်တော့ပါဘူး။ အဲ့လို အချိန်ဆွဲလုပ်တတ်တဲ့ အကျင့်တွေကြောင့် စာအကြွေးတွေပုံလာပြီး စာမလုပ်ချင်ဖြစ်လာရခြင်း ဖြစ်ပါတယ်။

၃ ) စိတ်အလိုလိုက်ပြီး စာမလုပ်တာ
ဒီအကြောင်းပြချက်ကတော့ ရှင်းပါတယ်။ ကျောင်းသားအရွယ်ဆိုတာ စိတ်ကိုပဲ ဦးစားပေးတတ်ကြပါသေးတယ်။ စာလုပ်ချင်ရင်လုပ်မယ်၊ တီဗီကြည့်ချင်ကြည့်မယ်၊ ဆော့ချင်ဆော့မယ်။ ပြောရရင် ကိုယ့်စိတ်ဆန္ဒတစ်ခုတည်းကိုပဲ လိုက်လုပ်တတ်ကြတာပါ။

၂၄ နာရီမှာ ကျောင်းမှာစာလုပ်ရတဲ့ အချိန်ကလွဲပြီး ကျန်တဲ့အချိန်တွေမှာ စာလုပ်ချင်စိတ် မရှိကြပါဘူး။ "စိတ်ပါမှ စာလုပ်လို့ကောင်းတာ" ဆိုတဲ့ သားသားမီးမီးလေးတွေပါ။ ညဘက် စာလုပ်မယ်ဆိုပြီး ကာတွန်းကားလေး ကောင်းနေလို့ ဆက်ကြည့်လိုက်မယ်၊ ပြီးမှလုပ်မယ်ဆိုပြီး အိပ်ပျော်သွားတာမျိုးက စိတ်အလိုလိုက်ရင်းကနေပဲ စာမလုပ်ဖြစ်တော့တဲ့ အခြေအနေ ဖြစ်ပါတယ်။

၄ ) အနှောင့်အယှက်များလို့
အနှောင့်အယှက်ဆိုတဲ့နေရာမှာ အပေါင်းအသင်းတွေကြောင့် ဖြစ်နိုင်သလို၊ အခြားသော ဖျော်ဖြေရေး အသုံးအဆောင်တွေဖြစ်တဲ့ မိုဘိုင်းဖုန်း၊ ဂိမ်း၊ တီဗီစီးရီးတွေကြောင့်လည်း ဖြစ်နိုင်ပါတယ်။

ကိုယ်က စာလုပ်မယ်ဆိုရင်တောင် သူငယ်ချင်းအဆွယ်ကောင်းမှုကြောင့် မလုပ်ဖြစ်တာမျိုး၊ ယနေ့ခေတ် အင်တာနက်ခေတ်မှာဆိုရင် ဖုန်းထဲကဂိမ်းတွေဟာ ကစားတဲ့သူကို စိတ်လှုပ်ရှားမှုကောင်းကောင်း ပေးနိုင်အောင် ဖန်တီးလာကြသလို စွဲလမ်းစေတတ်တာကြောင့်လည်း စာလုပ်ချင်စိတ် လျော့နည်းလာပါတယ်။ ဒါ့အပြင် တီဗီဒရာမာနဲ့ စီးရီးတွေကို အလွယ်တကူ ကြည့်နိုင်တော့ စာလုပ်ချင်စိတ်ကို အဟန့်အတား ဖြစ်စေပါတယ်။ ဒီလိုမျိုး ဖျော်ဖြေရေးအရာတွေဟာ ကျောင်းသားတွေအတွက် "တန်ဆေး လွန်ဘေး" ပါပဲ။

၅ ) အရွဲ့တိုက်ချင်တဲ့စိတ်ကြောင့်
ဒါကတော့ ဆယ်ကျော်သက်အရွယ် ကျောင်းသားတွေမှာ အဖြစ်များပါတယ်။ မိဘတွေအတွက်လည်း ကလေးတွေကို ထိန်းရခက်တဲ့ အရွယ်ပါ။ ဆယ်ကျော်သက်အရွယ်က လေ့လာစူးစမ်းချင်စိတ် ပြင်းပြသလို တစ်ခုခုဆိုရင်လည်း အကောင်းမြင်စိတ်ထက် အပြစ်မြင်တဲ့စိတ်က ပိုများတတ်ပါတယ်။

ကျောင်းသားတစ်ယောက်အနေနဲ့ စာလုပ်ရမယ့် တာဝန်ကိုတော့ သိကြပါတယ်။ ဒါပေမယ့် မိဘတွေက "စာမလုပ်ဘူးလား။ အဲ့လို စာမလုပ်လို့ပဲ သူများထက် နောက်ကောက်ကျနေတာ" စသဖြင့် ပြောလိုက်ပြီဆိုရင် သူတို့စိတ်ထဲမှာ "ငါ့ကို ကြိုးစားစေချင်လို့ ပြောတာပဲ" ဆိုတဲ့ အကောင်းမြင်စိတ်ထက် "မလုပ်ဘူး... ဘာဖြစ်လဲ" ဆိုတဲ့ အရွဲ့တိုက်ချင်စိတ်က ပိုများသွားပါတယ်။ အဲ့လို အရွဲ့တိုက်တတ်တဲ့ စိတ်ကြောင့်ပဲ စာမလုပ်ဖြစ်တော့တာ ဖြစ်ပါတယ်။

မိဘများအတွက် အကြံပြုချက်
ဒီလိုမျိုး အရွဲ့တိုက်တာတွေမဖြစ်ဖို့ဆိုရင် မိဘတစ်ယောက်အနေနဲ့ ကလေးရဲ့အကြောင်းကို သေချာသိဖို့ လိုပါတယ်။ ကလေးရဲ့ ပုံစံနဲ့ စိတ်နေစိတ်ထားပေါ် မူတည်ပြီး ခြောက်တစ်ခါ ချော့တလှည့် နဲ့ ထိန်းကျောင်းသွားဖို့ လိုအပ်ပါတယ်။

အခုပြောပြခဲ့တဲ့ အချက်တွေက ကျောင်းသားတွေ စာမလုပ်ချင်ရတဲ့ အကြောင်းတွေထဲက အဖြစ်များတဲ့ အကြောင်းပြချက်တွေပါ။ မိဘတစ်ယောက်အနေနဲ့ စာချည်းပဲ ဇွတ်လုပ်ခိုင်းတာထက် မိမိကလေးက ဘာကြောင့် စာမလုပ်ချင်ရတာလဲဆိုတဲ့ အကြောင်းပြချက်လေးတွေကို သိထားတာက သူတို့လေးတွေကို စာလုပ်ခိုင်းဖို့ ပိုပြီးလွယ်ကူစေပါတယ်။

ကလေးတွေမှာလည်း ကိုယ်ပိုင်အကြောင်းပြချက်တွေ ရှိကြပါတယ်။ ဒါကို မိဘတွေအနေနဲ့ နားထောင်ပေးပြီး နည်းစနစ်ကျကျ ကိုင်တွယ်တတ်ဖို့ လိုပါတယ်။ အကောင်းဆုံးဖြစ်စေချင်တဲ့ ဆန္ဒတစ်ခုတည်းနဲ့ အတင်းအကြပ် စေခိုင်းတာက အဆိုးတွေကိုပဲ ဖြစ်စေတတ်ပါတယ်။ ဒီအချက်လေးတွေကို သိသွားပြီဆိုတော့ ကိုယ့်ကလေးက စာမလုပ်ချင်ဘူးလို့ ပြောလာတဲ့အခါ ဘယ်လိုကိုင်တွယ်ရမလဲဆိုတဲ့ အဖြေတစ်ခုခု ရသွားလိမ့်မယ်လို့ မျှော်လင့်ပါတယ်။

တကယ်လို့ မိမိတို့ကလေးက စာသင်ခန်းထဲမှာ တကယ်ပဲ စာမလိုက်နိုင်လို့ အားနည်းနေတယ်၊ အခက်အခဲဖြစ်နေတယ်လို့ ယူဆရင်တော့ ကလေးရဲ့ လိုအပ်ချက်ကို အနီးကပ် ဖြည့်ဆည်းပေးနိုင်ဖို့ MMtutors မှာ တစ်ဦးချင်း (1 to 1) ထိရောက်စွာ သင်ကြားပေးမယ့် ဆရာ၊ ဆရာမများကို ဆက်သွယ်ခေါ်ယူနိုင်ပါပြီ။

မိဘများအနေနဲ့ အိမ်အရောက် (Home Tutor) သို့မဟုတ် Online ကနေ သင်ကြားပေးမယ့် ဆရာ၊ ဆရာမများကို အောက်ပါ Channel များမှတစ်ဆင့် လွယ်ကူလျင်မြန်စွာ ဆက်သွယ်စုံစမ်း ရှာဖွေနိုင်ပါတယ်။
Messenger - m.me/1084878888052992
Telegram - @mmtutorsofficial
Viber - 09790108000
Phone - 09790108000
Website - www.mmtutors.com/parents/tutors

#MMtutors #forparents